صوت وصورة يوم عادي ف افتتاح مهرجان نوادي المسرح

تعالوا يا شباب النوادي نقراء تغطية الشاعر والصحفي احمد زيدان لافتتاح مهرجان النوادي

بداية لمن لا يعرف المهرجان تأرجح بين لفيوم واي مسرح للبيت الفني او عائم الجيزة أو الشرقية ورسى على محافظة الشرقية بعد فضيحة كبيرة مفادها أن تكلفة الإقامة بالفيوم فقط تساوي نصف مليون جنيه .. يا حلاوة
ومحافظة الفيوم تدفع دعما للمهرجان مقداره خمسة عشر ألف جنيه ويتحط اللوجو بتاعها على اصدارات المهرجان كراعي ... يا حلاوة برضه
المهم بعد نقل المهرجان للشرقية وتغييير البوستر والبمفلت وكل حاجة واتشالت محافظة الفيوم واتكتب اقليم شرق الدلتا نسي اللي عمل التغيير البسيط ده لوجو محافظة الفيوم قدام اقليم شرق الدلتا !!! يعني بالعربي محافظة الفيوم كسبت انها راعي للمهرجان من غير خمستاشر الف جنيه .. ياحلاوة برضه
المهم المهرجان اتنقل للشرقية يعني دعم وشغل كبير، الإقامة للفرق هتشوفوها ف الفيديو وتسمعوها دعم دعم يعني، وطبعا اللي عليهم العين وصحفيين هياكلوا ويناموا ف أفخم فندق وشباب النوادي ف مركز الشباب، مش شباب بقى وشوفوا الفيديو بتاعهم
حفل افتتاح بديع للمخرج محمد العشري من بور سعيد وعرض افتتاح أكثر من رائع صورة تعبيرية لمحمد العشري أيضا عن حلم الأجنحة قدم خلاله المخرج حلولا بصرية حملت أحلام أجنحة فتاة صغيرة تريد ان تطير بعيدا عن قصف القنابل داخل أحد مخابيء الحياة
أما عن فقرات الحفل من تقديم وتكريم وكلمات، فقد اسهب وأفاض الأستاذ مصطفى السعدني رئيس اقليم شرق الدلتا الثقافي ووصلات من المجاملة بينه وبين محافظ الشرقية تبارى خلالها رئيس الإقليم ف الفصاحة والبيان والثناء والشكر وأفاض بها السيد المستشار المحافظ في أخطاء لغوية اظاهر خدته الجلالة طبعا، انما كله يهون عشان الإفتتاح واهو ف الآخر رئيس الإقليم خد درع فوق البيعة، وبقى من مكرمي المحافظة والمهرجان ولك ده فجأة بعد نجاحه ف دور مذيع حفل الإفتتاح
وانتهى الحفل بان كل واحد ادى زميله درع على رعايته وحكمته ونباهته ودعوا لبعض على المسرح ودعوا لشباب النوادي اللي بيحضروا الورش والمقهى المستدير اللي معرفش استدار امتى مقابل عشرة جنيه واللي مايحضرش الورشة يخسر خمسة جنيه واللي ما يحضرش القهوة يحاسب هوه ع المشاريب ف حتة تانية
المهم كان الجميل تكريم أسماء فنانين ونقاد اثروا حركة نوادي المسرح منهم الفنان سامي طه الأب الروحي للنوادي بعد مبتدعها دكتور عادل العليمي، وتكريم اسم المبدع الشهيد حازم شحاته من له باع طويل في دعم تجربة النوادي وذهب ضحيتها، وتكريم حمدي طلبة أحد اكتشافات المهرجان الأول للنوادي في دمياط، وكذلك الناقدة ناهد عز العرب أحد أهم داعمي تلك الحركة من النقاد والمبدعين
وانتهى العرض وخرجت كانت العربية اللي ركبناها من القاهرة فلسعت بموظفي ادارة المسرح المستعجلين يروحوا بعد ما مضوا حضور لزوم القبض أخر المهرجان، ورحت اركب عربية الهيئة قالولي دي للصحفيين قلت انا صحفي قالولي ماجيتش معانا من الهيئة يبقى ماتروحش معانا، وعرفت انهم خافوا لحسن اكون مندس من المعارضة عليهم وهاكل معاهم ف الفندق ومش هاكتب عن الإنجازات الكبيرة للمهرجان
المهم بعد شوية مناوشات وعادل حسان ضرب تليفون سخن رحت ولحقت العربية بكل كرامة واباء وروحت البيت وانا مش ناوي اروح تاني وكفاية قلة كرامة بقى
المهم شوفوا الفيديوهات عشان تعرفوا ان الصعيد مافيش منه ولا عرض ليه ، وتعرفوا معاناة شباب النوادي ف الإقامة، وتعرفوا قد ايه كل واحد ف المهرجان شايف شغله على أكمل وجه ممكن وشغله يعني قبضه عشان ماحدش يفتكر حاجة وحشة ولا حاجة
ويعيش الشعار الجديد رجالتي لازم تبات ف حضني ويسقط شعار اللي يخش للدكتور يقطع تذكرة عند التمرجي
اما عن باقي الأحداث فلها كلام آخر
خالص مودتي
أحمد زيدان
لينكات الفيديوهات على جروب مسرحهم على الفيس بوك
https://www.facebook.com/video/video.php?v=41213006742&oid=21745556270&saved#/video/video.php?v=41213656742&oid=21745556270
كلمة المخرج حمدي طلبة عقب تكريمه
https://www.facebook.com/group.php?gid=21745556270#/video/video.php?v=41213006742&oid=21745556270
مافيش عروض اتصعدت من الصعيد، يعني من بني سويف لأسوان مافيش عرض واحد عدل حسب كلام اللجنة ؟ سؤال نعرف جزء من إجابته
https://www.facebook.com/group.php?gid=21745556270#/video/video.php?v=41212541742&oid=21745556270
كيف تحصل على بوكت ماني عشرة جنيه من مهرجان نوادي المسرح
https://www.facebook.com/group.php?gid=21745556270#/video/video.php?v=41211861742&oid=21745556270
ان كان ليك عرض نوادي وهتسافر الزقازيق ده دليل شباب النوادي عشان يقضوا يوم عادي

شكرا لمجهودك يا بشبيشى

ربنا يستر معانا