الرئيسيةالبوابةمكتبة الصورس .و .جبحـثالتسجيلالأعضاءالمجموعاتدخول

شاطر | 
 

 للكبار فقط

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
waleed

avatar

عدد الرسائل : 708
العمر : 25
Localisation : انا زحمه و ربكه و شغل جنان .. نصي بيضحك و التاني زعلان .. انا شيء فلتان .. طيب شرير و جريء و جبان .. اوقات مشرق و اوقات بهتان .. و ساعات سليم .. و ساعات تعبان مفتري جدا و كمان غلبان .. انا م الاخر عفريت لابس بدله انسان
المذاج :
البلد :
my sms : لا تسال دموعي عن اوجاع الايام
تاريخ التسجيل : 28/10/2007

مُساهمةموضوع: للكبار فقط   الثلاثاء أكتوبر 07, 2008 2:49 am

مسرحية
للكبار فقط
تأليف/ محمود أسامة
الاوفرتير
(لغة الحوار / العامية المصرية)

www.nosous.com
المكتبة الالكترونية للنصوص المسرحية


الام تغنى لطفلها الرضيع المسجون بداخل سجن صغيروالام نفسها مقيدة بقيود كبيرة (مقترح : نامى نامى يا صغيرة يلا اغفى عل حصيرة).. تحدث تداخلات بالأصوات.. عين الام ترغرغ بالدموع حتى يؤثر حزنها بصوتها وتنتهي اغنيتها.



FADE اضاءة



اول المشاهد... .

*مشهـد الحـفــلة:

تبدأ بجماعه من الأصدقاء يقفون امام تورتة عيد الميلاد يغنون لصديقهم فى عيد ميلاده.. (غناء بلغة غير مفهومة)

يخرج الأصدقاء بتعبير حركي معين يترك لمصمم التعبير الحركي أو المخرج بعد خروج الجمع.. يدخل "شيطان"يمسك بيديه حبل طويل.. لكن ملابسه أرجو ألا تبدو بمظهر يثير الضحك.. يقوم بربط "هند" من يديها بالحبل.. ثم يسلم الطرف الاخر للحبل ل"أحمد".. ويشوشه.. فيقوم احمد بربط نفسه بالحبل ويعطى طرفه للشيطان (بطريقة مسالمة).. بعد ذلك يقوم احمد بشد الحبل حتى تأتى له هند.. وهى تقاومه.. حتى تتعب.. فتستسلم.. وتذهب له.. فيمسك بيدها مستعدا للرقص على موسيقة هادئة.. وهما يرقصان... طرف الحبل الذي يربط بينهما.. فى يد الشيطان... يظلا يرقصان.. حتى يتعبا.. فيقعان على الأرض.. (وقتها يترك الشيطان طرف الحبل الرابط بينهما.. بخفة).. ينظران لبعضهما بنظرة الشوق.. يدخل الشيطان ماسكا كمان.. يعزف عليه.. (تبدأ العلاقة)



*أحــمد وهــند:

هند : احنا ايه اللى عملناه ده... اااانت ازاى تعمل معايا حاجة زى دى... ليه يا احمد... انت مش بتحبنى؟!!.. كنت لازم تخاف عليا..

احمد : احنا عملنا ايه يعنى ؟!!.. احنا كنا اتنين وبنحب بعض..

هند : كنا!!

احمد : أنا قصدي يعنى.. ان اللى حصل كان غصب عننا.. احنا حبنا عمانا عن اى حاجة كانت بتحصل بيننا.. كل اللى حصل كان فوووق.. أعلى مننا اوى.. على العموم ماتخافيش كل اللى اتكسر هايتصلح..

هند : فعلا يا احمد؟؟.. حانتجوز؟؟

احمد : نتجوز؟!!.. اه.. اه طبعا.. وماله.. قريب اوى هاتلاقينى فى البيت... ايدى فى ايدين عمى بنقرا فتحتك .. وبنتفق على معاد خطوبتنا

هند : انا ليه بصدقك.. ليه فى حاجة جوايا بتلح عليا انى اصدق كلامك

احمد : لانه كلام من القلب.. واللى بيتكلم من قلبه.. عمره مايكدب

هند : (تؤكد) عمره ما يكدب..



*مشهــد العــيادة النفـسـية:

الدكتور : كمل اللى قولناه المرة اللى فاتت ... ايه اللى حصل ؟؟

المريض : انا كانت مشكلتى انى دايما مش عارف ايه اللى حصل عشان افكر اعمل ايه فى اللى هايحصل.. كانت كل خطوط الدنيا بتتشخبط فى دماغى.. كل خط فى طريق.. دايما مش لاقي للخطوط طريق واحد تتجمع فيه .. دايما فى حرب جوة عقلى.. صراعات.. وعشان أطلق صفارة بدأ الحرب.. طبعا كان ده طالب منى افكر.. واشغل دماغى.. وطبعا اكتر من الخناقة اللى عقلى فيها .. ما قدرتش.. الغريب انى وقتها.. اكتر قرار كنت صارم مع نفسي فيه.. واسرع قرار اخدته فى حياتى كان ... (يفكر)

الدكتور :كان ايه؟؟

المريض : (يمثل مشهد انتحاره) مش عارف... لقيت نفسى وقتها بامسك الحبل.. خليت الحبل يمشى على كل حته فى جسمى.. حسيت قد ايه هو ناعم.. لقيتنى بأرفعه بأيدى.. لأ لأ.. انا الاول عملته عقدة.. اه عقدة.. بس ليها فتحة كبيرة حبتين... علقت الحبل فى السقف.. كان شكله غريب اوى.. لأنى فعلا كانتاول مرة اشوف منظر زى ده.. (يضحك) مش عايز اقوللك اقعدت احب فى شكله قد ايه.. المهم.. كان فى كرسى.. شديته بسرعة.. حطيت رجلى عليه ورفعت نفسى.. ودى.. ودى كانت اول مرة ارادتى تدفعنى انى اعمل كذا حاجة مع بعض وبسرعة.. بعد ما طلعت فوق الكرسى مسكت الحبل وحطيت رقبتى جواه.. واطمنت انه محاوطنى.. لافف حوالين رقبتى.. كنت حاسس بدفا لذيـــــذ.. بعد كدة.. بدأت اشيل رجلى من على الكرسى.. بعدها.. حسيت براحة غريبة.. يااااااااه... (بعد سكون طويل- الدكتور يبتسم).. مالك يادكتور.. بتضحك ليه

الدكتور : تعرف انى حاولت اعمل زيك

المريض : تعمل ايه!!.. (ينزل من فوق الكرسى)

الدكتور : اعمل زي مانت عملت بالزبط.. بس فشلت.. فشلت حتى انى اخد القرار ده..

انت مستغرب.. عادى.. (بؤرة اضاءة-المريض خارجها)الغريب انى كان فى حاجة دايما بتوقفنى انى اسحب رجلى من على الكرسى- ممكن يكون خوف بيمنعنى- خوف من ربنا ؟؟من الموت نفسه ؟؟.. مش عارف.. مش مهم مش مهم..

المريض : (يمسك بالروشتة).. معلش اتأخرت عليك.. هاه.. انا سامعك.. ايه مشكلتك ؟؟

الدكتور : اه.. انا اسف انى لبست البالطو بتاع حضرتك (يعطيه البالطو).. انا تعبان اوى يادكتور (ينام فوق الشيزلونج)... ( fadeالاضاءة على ان الدكتور يحكى شكواه والمريض يسمع.



*مشـهـد مكالــمة التـلـيفـون:

هند : الو

احمد : الو.. مين معايا

هند : ايوة يا احمد انا هند.. انت فين ؟؟

احمد : اه.. ايوة يا هند.. فى حاجة؟؟

هند : هو ايه اللى فى حاجة.. مش كان المفروض اننا هنتقابل النهاردة؟!!

احمد : ماظنش.. على العموم انا مش فاضى.. (ضحكة نسائية عالية).. شفتى بقى.. (مجموعة تضحك)

هند : انت!.. انسان قذر..

احمد : شوفى بقى.. انا مش فاضى لكلامك الفارغ ده.. من دلوقتى اعتبرينى سافرت.. اختفيت..

هند : احمد.. انا حامل.. (تبكى)

احمد : حامل.. (صوت السماعة تغلق.. ورنة انشغال الخط)



*مشـهـد اسـماعــيل:

صديق (1) : اسماعيل !!! حبيب قلبى ... ايه اخبارك يا صديق عمرى... (يشتمه) يا ستيكر؟؟

اسماعيل : انا؟؟... الحمد لله ... انت عامل ايه ؟؟؟

صديق (1): زى الزفت... مش شفت خلقتك ... (يطبطب على صدره) .

اسماعيل : طب كويس اوى... شفت ايه اللى حصللى امبارح؟؟

صديق (1) : مش مهم ... انت هتصدعنى ... هاه مقولتليش .. ايه اللى حصل امبارح؟؟

اسماعيل : بعد اخر مشكلة ما بيننا.. رحتلها.. وحاولت اصالحها..

صديق (1) : هاه.. و عملت ايه؟؟

اسماعيل : حلقتلى .. فعملت ايه بقى.. قلت اقابلها تانى يوم على طول.. اغتت.. واحاول اعتذرلها .. اول ماشفتنى ..

صديق (1) : هاه عملت ايه؟؟

اسماعيل : راحت مناديالى الامن.. فمشيت

صديق (1) : ايوة كدة خللى عندك كرامة .

اسماعيل : استنى بس..

صديق (1) : ايه تانى؟!!

اسماعيل : لسه ماقولتلكش... اصله بعد ما ناديتلى الامن ولطشتنى بالقلم والحوارات دى...

صديق (1) :ايه ؟؟!!

اسماعيل : ايوه(سعادة كبيرة).. بعد ده كله رحت متصل بيها.. اول... ما... سمعت... صوتى

صديق (1) : هاه؟؟

اسماعيل : قفلت فى وشى السكة طبعا.. انت غريب اوى عايز بعد ده كله تعمل ايه يعنى؟

صديق (1) : اه صحيح.. ؟!

اسماعيل : ايوة اصله كله الا كرامتى

صديق (1) : عارف يا سمعة انا جوايا كلام كتير اوى نفسى اقولهولك ..

اسماعيل : اتكلم يا حبيبى.. انا سامعك

صديق (1) : هو كلام تقيل شوية عليك .

اسماعيل : ياعم قول .. (يقنعه)انا حلوف وهاستحمل

صديق (1) : خلاص... بما ان انت كدة ... بص بقى ياسيدى ... انت انسان لزج وشخصيتك زبالة ومعندكش كرامة وحاجات تانية كتيرة كدة مش عايز اقولها ادام الناس ...

اسماعيل : ياه.. (بعصبية)انت زودتها اوى.. متقول عادى مش انا عودتك على الصراحة؟؟

صديق (1) : اه اه.. وانا خلاص مبقيتش طايق اشوف وشك تانى ... اصل انا ما بحبش انافق حد...

اسماعيل :... (بعد سكتة- ضيق) اوكى اوكى.. (يقف وقفة اخذ قرار) .. تحب نخرج نروح فين النهاردة ؟

صديق (1) : انت عايز تروح فين ؟... دانت حبيبى .



*مشـهـد مدرب كـرة القـدم والمذيعـة والمصــور:

المذيعة : وطبعا يا فندم احنا جايين النهاردة نهريك اسئلة... وطبعا براحتنا... حضرتك ازاى انت ولعيبة منتخبنا عرتونا.. اقصد احتليتوا المركز الاخير فى البطولة... برصيد (0) من النقاط والاهداف.. اظن خللى عند اهلك دم و رد.

المدرب : احنا عملنا اللى علينا انا والعيال وامهم بس اقول ايه بقى زى مانتى شوفتى.. بس كان فى حد الحكم سايبه يجرى فى الملعب كدة براحته..

المذيعة : مين ده حضرتك؟؟

المدرب : واحد كدة طول ال90 دقيقة بيتمشى رايح جاى رايح جاى.. كان لابس اسود .

المذيعة : (تتذكر)اظن انه كان.. اّه... ده الحكم.

المدرب : ياراجل

المذيعة : راجل!!!.. (تنظر فى المراّه).. ده عمى حيسى.. "ايه الحلاوة دى" ورجعنالكوا تانى اعزائى المشاهدين.. طب فى سؤال بقالوا سنين بيزغزغنى... حضرتك يا فندم... ليه المنتخب متكون من 22 ابن من ابناء الفاميلى بتوع حضرتك وصحابك.. والناس دى.. هه.. رد ردت الميه فى زورك .

المدرب : يعنى هما من عيلتى بس.. مش دول ولاد مصر برضه.. وبيخافوا على اسم مصر... لا مؤاخذة بقى حضرتك... objection

المذيعة : او نووو... مستهدفة انا بالكلمة دى... (تشاور للبودى جاردز).. ارمووه... قروى الولد ده... (هف).. اعزائى المشاهدين.. دلوقتى جه معاد سؤالنا ليكوا.. للناس اللى فى البيوت اللى قعدة مالهاش لازمة كدة... كام هو عدد الاهداف اللى سجلتها كل منتخبات البطولة فى منتخبنا... وهل كان لازاعة نجوم FM دورا فى تلك الهزائم ...عفوية انا فى الاستجوابات..

باى باى.. تمسك رجل الكاميرا وتخرج به من الكالوس وهى سحباه.

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
waleed

avatar

عدد الرسائل : 708
العمر : 25
Localisation : انا زحمه و ربكه و شغل جنان .. نصي بيضحك و التاني زعلان .. انا شيء فلتان .. طيب شرير و جريء و جبان .. اوقات مشرق و اوقات بهتان .. و ساعات سليم .. و ساعات تعبان مفتري جدا و كمان غلبان .. انا م الاخر عفريت لابس بدله انسان
المذاج :
البلد :
my sms : لا تسال دموعي عن اوجاع الايام
تاريخ التسجيل : 28/10/2007

مُساهمةموضوع: رد: للكبار فقط   الثلاثاء أكتوبر 07, 2008 2:50 am

*الأم وهــنــد:

البنت : (تبكى.. تملس على بطنها بحزن شديد.. عندما تدخل امها عليها.. تمسح دموعها بسرعة حتى لا تراها امها)

الام : (تداعبها).. ممكن ادخل

البنت : اه.. اتفضلى يا ماما..

الام : عايزة اقعد معاكى شوية كدة.. وهامشى على طول..

البنت : لأ.. ماتمشيش.. خلينى فى حضنك يا ماما.. محتاجاكى اوى.

الام : تعالى يا بنتى.. تعالى يا حبيبتى.. هه.. ما قولتليش.. ايه رأيك فى العريس اللى جالك النهاردة؟

البنت : العريٍٍس؟!!.. اه.. هو.. بس.. (تبدأ فى البكاء)

الام : مالك يا بنتى ؟؟ فى ايه ؟؟

البنت : ماما ... انا عايزة اصارحك بموضوع ... بس ارجوكى يا ماما عايزاكى تسامحينى... (تزداد فى البكاء)... انتى اكيد هاتسامحينى صح؟؟

الام : مسامحاكى يا بنتى .. بس قوليلى ايه اللى تعبك !!

البنت : (تبكى) ماما... صدقينى.. اللى حصل ده كان شئ غصب عنى .. انا ماكنتش اعرف ان ده هايحصل.. انا كل اللى عملته انى صدقته

الام : صدقته!!.. صدقتى مين؟!!.. وايه اللى حصل.. (تمسك يدها بشده) انطقى..

البنت : ماما.. انا.. انا حامل .

الام : بعد سكتة طويلة (غضب)... انتى بتقولى ايه!!.. (تضحك بهستيريا)... بنتى!.. لأ.. انا ربيتك كويس.. لأ بنتى لأ.. (تضربها).. انتى حيوانة.. حيوانة.. وسافلة.. يا ريتنى ماجبتك.. ياريتنى ما خلفتك..

البنت : اّهههههه( تصرخ من الألم )



*مشـهــد الكــباريـه:

الصبى: شفتى يا ابلتى ؟؟

العالمة : مالك يا وله ؟؟

الصبى : بسمع ان الولية زوزو باطنية ها تنزل فيديو كليب جديد.. بيقولوا ان الترزى سرق منها القماش وجرى

العالمة : فيديو ايه؟!!! ده عند الست الوالدة ان شاء الله .

الصبى : طب هاتردى عليها يا ابلتى .. ولا هاتسكتيلها؟؟

العاملة : اسكتلها !! ده عند امهااااا (ردح).. طب عليا الطلاق من الراجل اللى نايم فى البيت ده.. لانا منزللها شريطين فيديو كليب.. عليها اسطورة الرقص البلدى.. وتبقى تقعد تتحسر على جتتها.. ونشوف مين اللى هايكسب ؟!

الصبى : مانتى قادرة وعافية.. "ربنا يهدك"

العالمة : ايه يا وله.. مالك الايام دى مش زايط كدة.. قوللى ياواد وفضفض دانا زى الست والدتك اللى فى سن اختك بالزبط..

الصبى : اصل الراجل اللى اديتيلى عنوانه امبارح عشان اروحله ... (يتظاهر بالبكاء)

العالمة : عمللك حاجة ياله ؟؟

الصبى : كان ماسكنييييييييى...

العالمة : منين... ؟؟

الصبى : والله مافاكر حاجة من ساعتها ... ابن الايه نسانى الدنيا ومافيها.. فكرنى بسى راغب علامة.. (يغنى).. نسينى الدنيا.. نسينى العالم

العالمة : يابن الــ... . (تجرى وراه)- بعد ما تمسكه – طب والراجل التانى يا له (تمسك برجل من اللى على المسرح وكأنها تتكلم عنه)... اوعى تكون زعلته... ده سيدنا كلنا... انطق... عملت معاه ايه؟؟

الصبى : لأ ده(استغراب)!!! ده عادى خالص.. لأ الفياجرا كانت عاملة عمايلها معاه.. بس فعلافعلا.. حبيته من اول نظرة.. (يطقطق اللبانة)

العالمة : (ترمى الرجل فى الكالوس)... يوه... ما تسترجل شويه يا وله .(تضربه على ظهره)

الصبى : (شهقة) استرجل اكتر من كدة ايه يا ابلتى دانا حتى اتعب (هيهييييييه).



*مشــهـد المجــانـيـن:

نرى 3 من المجانين.. يجلسون على كراسى مبعثرة وجههم فى وجه بعض

باول المشهد يسلمون على بعض 3 مرات على الاقل كأنهم يتعرفون على بعض.. ثم يتحادثون

مجنون (1) : انت ايه رأيك فى اللى بيحصل حوالينا وفى البلاد المجاورة

مجنون (2) : انا شايف انه اكيد.. مكيدة جديدة من الدولة العظمى.. واحنا لو ماخدناش احتياطاتنا من الاول ممكن نقع فيها بسهولة.. (يتحدث مع مجنون 3) وحضرتك شايف ايه ؟

مجنون (3) : انا شايف ان اسعار الفراخ بتعلى.. بعد ما كانت الفرخة بـ 2 جنيه.. بقت بنص جنيه.. يا جماعة ده مؤشر مش كويس اطلاقا..

مجنون (2) : فعلا.. ولازم يبقى لينا وقفة.. يا اما نتبط.. يا اما نتمط

مجنون (1) : حضرتك نظريتك صحيحة 100%.. وطب وايه اخر القرارات اللى اخذت فى الفترة الاخيرة بالنسبة للموضوع ده؟؟

مجنون (3) : افتكر اخر قرار اننا .. (يتذكر.. ويسأل مجنون (2).. ).. نتبط ؟؟

مجنون (2) : وده كان قرار زعل كل اخوانا اللى فى الاود التانية.. عشان كدة لازم ناخد قرار.. يا جماعة احنا لازم نتمط.. مش معقول.. قعدنا طول عمرنا نتبط نتبط.. بقينا زى غطا القازوزة.. انا شايف ان ده بقى شئ لا يمكن السكوت عليه.. يا اما ممكن تحصل مضاعفات جوانا مش كويسة.. ممكن ننفجر مثلا..

مجنون (1): ده طبعا اسقاط على القازوزة.. نفور بمعنى اصح..

(المجانين يضعوا رؤوسهم برأس بعض.. لاتخاذ قرار مهم)

مجنون (1),(3) : اتفضل ياريس..

مجنون (2) : قررت انا زعيم الامة.. بعد المشاورات والمناورات.. ان الامة.. لازم تفور

مجنون (1),(3) : فووووو(صوت فوران)

مجنون (2) : زى كدة اهو.. (يشير على المجانين اللى معاه).. وان الامة هى ...

صوت الممرض : معاد جلسة الكهربة..

مجنون (2) : وان الامة..

صوت الممرض : معاد جلسة الكهربا ياهبل انت وهو

مجنون (2) : وان الامة... لازم تتكهرب

(يتجمع ثلاثى المجانين ويمسكون بأيدى بعض كسلسلة ثم تحدث الكهربا.. دخان و flasher)

مجنون (2) : (يتكلم وهو متكهرب) وشكرا لكم والسلام عليكم ورحمة الله.. (يسقط على الارض)



*مشـهــد الأم والأب:

الام : كنت منتظر ايه؟!!..

الاب : انا مشكلتى انى ماكنتش منتظر حاجة..

الام : لانك كنت بايع من الاول.. ماهمكش بنتك عاملة ايه.. هاتقدر تعيش من غير اب ولا لأ.. ليه؟؟.. ليه اطلقنا..

الاب : متتكلميش عن طلقنا.. الموضوع ده مالوش اى علاقة باللى حصل

الام : مالوش اى علاقة ازاى.. بنتك فى اول فرصة جاتلها عشان تبيع نفسها.. باعت نفسها.. وبالرخيص اوى

الاب : فلسفة فارغة.. تقدرى تقوليلى كنتى فين وهى بتعمل اللى عملته ده.. ايه اللى شغلك عنها.. ماتردى..

الام : وانت كنت فين؟؟ سبتنى وسافرت.. سبت بنتك وهى فى قمة احتياجها لأبوها.. تقدر تقوللى انت سافرت ليه؟؟

الاب : كنت مسافر اجيب فلوس.. كنت باشقى واتعب واموت.. عشان اجيبلى واجيبلك انتى وبنتك اللى يقدر يخلينا نعيش..

الام : كنت بتشقى وتتعب!!.. مع مين؟؟.. وعشان مين؟؟ عشانها طبعا.. اول ما لقيت ان الدنيا بدأت تبقى فى ايدك.. ولقيت برضه انى انا وبنتك لا نصلح اننا نكون من عيلتك اللى ممكن تشرفك قدام صفوة المجتمع.. اتجوزت عليا.. رميتنى.. ورميت بنتك.. واهى.. دى النتيجة

الاب : يا ا..

الام : (تقاطعه) ماتلومنيش.. لوم نفسك.. بعدين ابقى تعالى حاسبنى.. بنتك ضاعت يا رجل الاعمال الشهير.. بنتك.. راحت



*مشـهــد المحـاكــمة:

الحاجب : محكمة !!!

القاضى : نادى على القضية الاولى...

الحاجب : المتهمة(هند تقف) المتهم (احمد يقف وهو يلعب بالموبايل)

المحامى : انا وحيد المحامى الوحيد.. حاضر مع المتهمة..

مجموعة من الناس : حاضرين مع المتهم.. (بصوت عالى يخوف القضاه)

المحامى : انا وحيد المحامى حاضر مع الكسبان.. (يذهب مع المجموعة)

الادعاء(وكيل النيابة) : (وهو يقلب فى اوراقه) سيدى القاضى.. حضرات المستشارين.. نحن امام جريمة يندى لها الجبين.. جريمة يشيب لها الولدان.. جريمة...

القاضى : لخص.. ايه هى الجريمة؟؟

الادعاء : خليك معايا ثانية واحدة.. اّه.. (يختار ورقة من التى امامه فى ملفه).. بناء على الادله السابقة.. (بانفعال).. اطالب بأقصى العقوبة للمتهمة..

القاضى : ادلة ايه!!.. انت قلت حاجة ؟!

الادعاء : لا مؤاخذة.. دى كانت اخر ورقة.. (لنفسه)انا كنت مرقمهم.. مين اللى مسحهم...

القاضى : انجز لأحطك معاها فى القفص..

هند : ممكن اتكلم يا سيادة القاضى

مستشار(1) : اتفضللى

القاضى : واروّح انا!!!

مستشار (1) : ليه مانت قاعد ؟!

القاضى : مانت اللى بتأمر وبتنهى فى القعدة !!

مستشار (2) : (مستيقظا من نومه.. بهدوووء جدا).. يا خوانا عيب كدة الناس قاعدة.. اقعد دلوقتى.. وانا بعد الجلسة حاجيبلك حقك

القاضى : هفففف.. اتفضلى عايزة تقولى ايه؟

هند : يا سيادة القاضى.. انا قضيتى ابنى.. انا عارفة انه جه من غلطة.. وانا باعترف انى غلطت.. بس ماكانتش غلطتى انا لوحدى.. ابنى ده ناتج من اتنين اغواهم شيطان.. وده معناه ان هو كمان غلط .. انا مش بطالب انكم تحاكموه اللى بطلبه انه يعترف بابنه.. حاكمونى.. بس يعترف بأبنه.. ابنه اللى هايعيش طول عمره شايل ذنبى وذنبه.. واللى والله العظيم والله العظيم من صلبه.. (كلامها يبدأ فى الانهيار) انا فعلا غلطت.. بس ارجو المحكمة تبقى عادلة فى حكمها

الادعاء : وهاهى سيدى القاضى قد اعترفت بجريمتها الشنعاء.. التى ظلت تخطط لها.. وتدبر لها.. ولذلك اطالب...

القاضى : ياخويا رتب ورقك الاول و بعدين اتكلم... هاه كنا بنقول ايه؟..

المحامى : اعترض يا سيدى القاضى واطالب...

احمد : استنى يا متر.. انا عايز اتكلم

القاضى : مين البيه ؟

المستشار(2) : (يستيقظ من نومه).. ده اللى غلط معاها .

القاضى : اه.. احمد.. اتفضل يا حمادة اتفضل يا حبيبى.. عايز تقول حاجة

احمد : كنت عايز اقول لكل الناس.. انا فعلا كنت على علاقة بيها.. (يتكلم مع الصالة) يا جماعة انا غلطت مع البنت دى.. بس ايه اللى يضمنلى انها ماغلطتش مع اى حد قبل كدة..

هند : انت انسان حقير...

المحامى : اعترض على سب موكلى.. واطالب...

القاضى : اولا اعتراض مقبول.. ثانيا.. هو ايه اللى يضمنله ان ده ابنه ؟!

هند : فى مليون طريقة تثبت انه ابنه.. اولهم ال دى ان ايه

القاضى : لا يا بنتى .. ال دى ان ايه لا يعطى نتائج مؤكدة.. 99,99% مش نتيجة تاخد بيها المحكمة..

احمد : ثانية واحدة اكمل كلامى.. اولا انا عرفت ان رأى رجال الدين بيقول انى مش ملزم بأى حاجة ليكى.. لا ملزم انى اتجوزك.. ولا ملزم بابنى اللى جاى منك.. ولا ليه ورث منى بعد ماموت..

القاضى : بعد الشر عليك يابنى..

هند : اهه يا سيادة القاضى.. اعترف بأبنه

احمد : انا ماعترفتش بحاجة.. انا هاقول حاجة صغيرة.. من الآخر.. انا اللى واقفين معايا كتير.. وعلى فكرة.. الراجل فى الموضوع ده بالذات مابيتحاكمش لأن مالوش ذنب.. (يبكى).. هى اللى اغوتنى يا سيادة القاضى.. هى اللى قيدتنى فى شباكها.. شرفى يا سيادة القاضى.. شرفى (يبكى بحدة)

القاضى : اهدى يابنى قطعت قلبى..

المستشار (1) : ذئبه من البشر

احمد : .. هى اللى وقعتنى فى الخطية.. انا كنت طول عمرى انسان محترم.. (موبايله يرن).. ثانية واحدة جايلكوا تانى..



Fade اضاءة

الحاجب : سنعود..



احمد : (يتكلم فى الموبايل.. مع اظلام على قاعة المحكمة ماعدا البؤرة التى يقف فيها احمد).. ايوة يا سوزى ايوة يا حبيبتى.. جايالى البيت.. طب قشطة عشان نبقى على راحتنا.. يوووه.. يادى الجواز اللى قالبه بيه دماغى.. فكك بقى من اللى انتى فيه ده.. انا شوية وجايلك على طول.. يّلا.. قلتلك سلام.. باى.. باى

الحاجب : عدنا



احمد : وهو ده اللى حصل يا سيادة القاضى.. وانا راضى بحكم المحكمة

القاضى : (مخاطبا هند) (يسكت لوهلة) قصر الكلام.. عشان عايزين نمشى.. الولد اللى بنتكلم عنه ده ابنك ولا مش ابنك ؟

هند : وابنه هو كمان

القاضى والمستشارين : ابنك ولا مش ابنك

هند : ابنى

الادعاء : وهاهى يا سيدى القاضى تعترف بــ...

القاضى : ششش.. حكمت المحكمة حضوريا على المتهمة.. بالعقوبة اللى يراها الراجل الطيب ده.. وبالنسبة للطفل.. كفايه اوى تطمن عليه مرة كل سنتين..

الادعاء : كتير سنتين.. خليهم تلاتة.

القاضى : عنيا... حكمت المحكمة بحبس الادعاء 3 سنوات مع الشغل والنفاذ.. رفعت الجلسة



*مشـهــد إعــدام هـند / تعـبـيـر حـركــــــي.

ابطال العرض جميعا على المسرح يضحكون عاليا بسخرية.. نرى رجال الاعدام يسحبون هند من يديها من اخر الصالة وهى تقاومهم.. وتتمتم باّيات قراّنية.. وتبكى بشدة.. ثم يصعدوا بها لأعلى خشبة المسرح.. يهيئوا لها المشنقة جيدا.. ينشقوا ابطال العرض على جانبى المسرح.. يظهر فى وسط المسرح طفل صغير ظهره للجمهور بداخل سجن صغير ينظر لأمه وهى تعدم.. وقبل موتها.. تهدأ اصوات الضحكات.. الام تنظر لابنها وتبتسم... وتموت

تأليف/ محمود أسامة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
للكبار فقط
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: الاقسام الاساسية :: نصوص مسرحية-
انتقل الى: